港人幸福感排120名

【明報專訊】香港人出咗名生活節奏急促，好多人都呻有壓力。由美國蓋洛普（Gallup）顧問公司同健康機構Healthways合作嘅2014年全球幸福指數顯示，喺145個國家或地區中，香港排到去120，同新加坡、台灣相比差一大截。


高內地7名 僅經濟指標較佳

呢個指數以生活目標、社會、經濟、社區歸屬感同健康5項領域，調查每個地方人民有無幸福感覺，調查共涵蓋全球145個國家或地區，訪問超過14.6萬名15歲以上嘅人，結果中美洲國家巴拿馬排名第1，亦係巴拿馬連續兩年奪得「最幸福國家」稱號，報告形容巴拿馬人每日都感到快樂，無太多壓力及憂慮。而頭10名全部都係美洲同歐洲國家。


香港就排名第120，根據調查，港人覺得自己喺生活目標、社會、經濟、社區歸屬感同健康嘅幸福感，分別全球排名140、134、23、108及140，只有經濟一項指標較為名列前茅，其餘都係排名末端。中國大陸排名比香港更差，排127；新加坡就排97，而兩岸三地之中就以台灣排名最高，排第59。排名包尾嘅係阿富汗，成為「最不幸福國家」，受訪居民完全唔覺得喺邊個領域有幸福感。


港大社會工作及社會行政學系教授葉兆輝話，今次調查期間撞正本港嘅佔領運動，市民喺政治上感到無力，人際關係亦撕裂。佢期望隨住政改落幕，社會各界可以重新修補關係。