馬雲郭廣昌杭州結義

【明報專訊】古有劉關張桃園結義，一向自視甚高嘅復星（0656）董事長郭廣昌，噚日都搞咗個「杭州結義」，佢仲自稱老二，認馬雲做契大佬，另一位富豪、萬向總裁兼琥珀（0090）大股東魯偉鼎就自認老三，不過，劉關張入面向來關二哥最威，郭總咁樣上契法唔知有無咩特別意思？

網商銀行開幕，一眾英雄都走出嚟站台，可見馬雲喺一批內地富豪入面嘅江湖地位。郭廣昌呢種大佬級人物唔單只親自到場，仲話大股東已經講咗遠景，自己呢個「老二」就會做好接住落嚟嘅工作，魯偉鼎跟住發言就自稱「小三」，講到好似馬雲變咗佢哋大佬咁。


主角劉皇叔，呀唔係，馬雲就壓軸發言，佢話網商銀行要做到「無微不至，與眾不同，有情有義」，又「微」又「眾」當然係意有所指，不過小琴關心嘅係點樣有情有義，嗱，第日爭你錢唔還可唔可以拖住先？

email: piano@mingpao.com

[小琴密語]