誠哥推介「人生OS」

【明報專訊】汕頭大學校董會名譽主席李嘉誠永遠走在世界尖端，佢噚日出席汕大畢業典禮時，就同現場2000幾個畢業生，推介一種新OS。咩嘢係OS？OS就係你部智能手機或者電腦嘅操作系統（Operating System），久唔久就要update吓。今次誠哥就叫大學生update吓自己嘅人生系統，佢推介以「同理心」作為內核，以「仁能善斷」、「仁能善擇」為目標功能。


誠哥話，當今成功人士要應對「三重底線」：「要對經濟有所掌握，對環境保護有所承擔，對人類生活有所貢獻，這『三重底線』的概念已是最基本要求。如你想成為明天的領袖，世人對你嘅氣節和能力要求，基準將更高」。


誠哥認為「同理心」係回報最好嘅投資，「一念同理心，有無可量度的威力，我認為它是世界上最值得投資嘅『儲備貨幣』」。佢勉勵學生要為「改善今天、貢獻明天」尋求最佳方案，拒絕主觀標籤、拒絕不認真、拒絕僵化。