香港年報佔中有11張相

【明報專訊】去年可謂政制發展風雨飄搖嘅一年，政改爭議觸發咗為期79日嘅佔領行動，政府噚日出版嘅最新香港年報，講述去年發生嘅重要大事，「大事紀要」部分提及警方喺9月28號施放催淚彈，驅散政總外嘅示威者，又提到電視直播學聯代表同政改三人組會面、佔中三子自首，同埋移除旺角、金鐘、銅鑼灣嘅障礙物，不過內文章節入面，政制嗰部分冇提過佔領行動，只喺公共秩序嗰部分提咗兩句，話非法嘅佔領行動持續79日，警方就違法行動採取適當措施，以維持公共秩序。年報出咗11幅佔領期間嘅相，包括特首梁振英同政務司長林鄭月娥喺放完催淚彈之後見記者等。


變形金剛首映、宮崎駿手稿展 列為去年大事

除咗佔領行動，Emily仲發現政府將《變形金剛4》喺香港舉行全球首映、1600隻紙熊貓展覽、宮崎駿所屬嘅吉卜力工作室手稿展，都列為去年大事之一，睇嚟政府都幾重視呢類文化或娛樂活動。