黃之鋒入廠 醫生以為畀差人打

【明報專訊】學民思潮召集人黃之鋒噚日凌晨同學民成員兼女友錢詩文喺奧海城睇完戲，行到大角嘴時突然遇襲，入咗廣華醫院驗傷，之鋒噚日朝早出院後喺facebook話，有醫生問佢「係咪又係警察打人？」，令佢驚訝，即刻同醫生澄清，「今次應該唔關警察事，係無啦啦被個途人拳打腳踢」。


Emily記得大半年前佔領旺角期間，有示威者同警方衝突後受傷，都係入咗廣華驗傷。有網民留言話，佔領開始就有唔少受害者入廣華，嗰度啲醫生知發生咩事。今次事件唔同，但或因涉及主角係之鋒，先令醫生有誤會。


今次之鋒遇襲，雖然有唔少網民力撐佢，但亦有唔少人將個焦點放咗喺「點解唔還拖」，又或者罵佢「冇保護女朋友，令佢受傷」、「唔係男子漢」等，有網民就話，係咪要求所有人都要極硬淨、極勇敢，被人打嗰陣會驚、手足無措，咁又如何。