「短褲內鬼」泄密？ 樹根﹕你都講到好明

【明報專訊】建制派WhatsApp群組泄密風波真係日日都有新鮮料，最新發展係民建聯立法會議員鍾樹根喺DBC節目話，建制派已經捉到鬼。樹根一邊話淨係知道自己唔係內鬼，一邊又話佢懷疑嘅「內鬼」平日同佢一樣口沒遮攔，但現時「乖好多」，應該係無黨派議員；被主持人問到「內鬼」係咪會著短褲時，樹根話「你都講到好明喎」。


喺立法會著短褲嘅議員唔多，泛民有社民連梁國雄，建制派就有無黨派嘅謝偉俊。謝偉俊噚日話，要講嘅已經講咗，亦唔想再就呢件事討論。Emily聽落覺得有啲似中聯辦主任張曉明前日嘅「自動收聲」論，主任都話自己該講嘅已經講咗，所以要自動收聲唔再講政改，睇嚟謝偉俊今次跟番主任條line噃。