「人民武士」又贏 田少再拉頭馬

【明報專訊】相信唔少人都記得，自由黨榮譽主席田北俊買咗隻馬，改名為「人民武士」，早前贏咗今個馬季第689場賽事；噚日賽馬日「人民武士」又出場，更以大熱門姿態勝出，令田大少喺一個月內兩次拉頭馬喇。


「人民武士」噚日跑新馬賽，不過僅得5隻馬參與，佢以1.2倍大熱門姿態勝出，今次就令馬主贏得31萬蚊獎金，連同之前兩場比賽，呢隻新馬至今已為田大少帶來67萬蚊獎金。


上次田少喺馬場同班唔識嘅馬迷一齊拉頭馬，與民同樂，或者今次係大熱門啦，田少有備而來，有成班自由黨黨友，好似上水鄉事委員會主席侯志強，自由黨區議員陳浩濂、李鎮強，青年團主席李梓敬等，齊齊為「人民武士」打氣，結果隻馬亦不負眾望。