青年服務團5年僅百人參加

【明報專訊】前特首曾蔭權喺2010/11施政報告中提出設立「香港青年服務團」計劃，畀18至29歲青年去內地相對窮困嘅地區服務成個學年或一個學期，但計劃推咗5年，參加人數只得約100，即平均每年只有20人成行。據知參加者目前只有兩個地方揀，分別係廣東省韶關市同埋梅州市，以教學支援為主。


近年中港關係緊張，內地訪港客減少，唔知係咪因為中港矛盾，令該義工計劃推出5年參加人數一直偏低？民政事務局首席助理秘書長馮浩賢話，一直都好想多啲後生仔參加，話可能佢哋要考慮清楚先報名。反觀今年民政局新推嘅聯合國志願人員組織——香港大學生義工計劃，服務地點為東南亞地區嘅聯合國轄下組織，名額得10個，一開始就有幾十個學生報名。呢個計劃性質同實習相似，可到聯合國設於老撾、柬埔寨同緬甸嘅聯合國糧食及農業組織、聯合國人口基金同毒品和犯罪問題辦公室等服務，為期半年。如果你想做義工，又會報邊個？