6月首28日旅客跌1.9％

【明報專訊】一連三日嘅香港龍舟嘉年華噚晚深夜結束，旅發局話去到噚日下午5點已有約14.5萬人次到場觀賞，其中「國際公開錦標賽」由東莞麻涌光大龍舟隊勝出，而「建行（亞洲）龍舟邀請盃」就由中國香港龍舟總會龍舟隊勝出。今年賽事唔止鬥快咁簡單，第一次喺海上增設別開生面嘅「龍舟海上拔河」，仲有鬥靚，唔同隊伍亦都以搶眼造型現身「香港航空扮嘢大賽」，爭奪「特色造型大獎」。


商務及經濟發展局長蘇錦樑噚日做頒獎嘉賓，頒獎畀各個比賽得勝者，之後佢當然要講吓旅客數字，佢話，6月首28日整體旅客數字較去年同期下跌1.9%，認為香港要舉辦更多盛事，繼續成為旅遊盛事之都。


蘇錦樑話，內地旅客「一周一行」措施實行咗只有3個月，大多數旅客仍然以舊有「一簽多行」簽注來港，整體「一周一行」成效要觀察多一段時間先會有初步、較明朗嘅走勢。