邵善波京港澳辦「見舊朋友」

【明報專訊】律政司長袁國強訪京期間，中央政策組首席顧問邵善波噚日早上突然喺北京港澳辦出現，引起一眾記者留意。邵善波離開時，只係話去港澳辦「見舊朋友」，無具體講見邊個。至於有無傾到政改同香港問題呢？佢話乜嘢都有傾，又話有啲公共同社會政策上嘅事務要推行，但要等成熟先公布，認真神秘。


袁國強噚日朝早就喺港澳辦逗留近兩個鐘後先離開，但佢其後表明，今次係同港澳辦法律部嘅人見面，未有見港澳辦主任王光亞，交代得比邵善波透明。袁國強係繼財政司長曾俊華喺政改方案被否決後，第二個訪京嘅特區政府司局級官員。袁司長噚日下午已經結束喺北京嘅訪問返香港喇。