文聯會成立 猛人多 陳景祥做總裁 答稱唔識「造王」

【明報專訊】香港有結社自由，近年愈嚟愈多社團、總會成立，好似一個叫做「香港文化產業聯合總會」（文聯會）嘅，來頭唔簡單，由中國文化產業協會會長張斌為首屆監事會主席、香港旅發局主席林建岳為首屆理事會會長。有知情人士話，呢檔嘢主力搞文化產業、搞生意，唔係大家所諗嘅政治喎。


林建岳任理事會會長

理事就有外界稱為「鋼鐵公主」嘅嘉鑫控股集團總裁陳寧寧，仲有新世界發展主席鄭家純、星島新聞集團主席何柱國、鳳凰衛視董事局主席兼行政總裁劉長樂、恒大地產主席許家印、英皇集團創辦人楊受成、信和主席黃志祥、蒙牛乳業創辦人牛根生，仲有影星趙薇！

文聯會噚日發新聞稿，交代佢哋噚日召開首次理事會暨常務理事會會議，決定今年第三季舉行成立典禮，會議並產生首屆監事會和理事會成員。


總會不但可以凝聚到上述嘅富豪猛人，仲搵到《信報》前副社長及數碼媒體總裁陳景祥，出任文聯會行政總裁。Emily問，文聯會有咁多猛人，係咪與政治甚至特首「造王」有關嘅，陳景祥就笑言「我唔識做喎」。佢話直至呢一刻，佢只知個會真係想做文化產業嘅事，暫時個會只有佢同另一個負責財務嘅同事，架構簡單。