鍾樹根評CY「大志難成」

【明報專訊】特首跑馬仔已成政圈討論話題，早前曾寫文〈假如我真的去參選特首……〉嘅民建聯鍾樹根，噚日就喺電台節目論盡特首熱門人選，話將來係咪會繼續支持特首梁振英（CY），就要視乎對方嘅政績。樹根話CY好有心，但有啲嘢做唔到，形容對方係「大志難成」，又形容CY個人都有問題，「政治嘅事太多，但佢推得太急，咪好多人捉住佢囉」。


節目主持人畀選擇題鍾樹根答，問佢如果財政司長曾俊華、前財爺梁錦松及梁振英參選特首，佢會揀邊個？樹根話「那無辦法，逼我投梁振英」，佢解釋曾俊華做法似梁錦松，「蕭規曹隨」；梁錦松就好似佢咁「太過大意」。咁政務司長林鄭月娥呢？樹根話「真係有得諗喎」，主持再問如果民建聯前主席譚耀宗呢？佢就話「咁梗係譚耀宗啦」。