市民帶「假普選」單張入立會遇阻

【明報專訊】佔領運動過咗，政改又否決埋，不過立法會保安就仍然森嚴，噚日交通事務委員會舉行公聽會，出席嘅公眾人士全部要先經安檢先可以進入大樓，而隨身物品過完scanner要再經人手檢查。


青年公民副主席李俊晞過完安檢後，保安人員喺佢袋內發現一張「向假普選說『不』」單張，保安人員話傳單同會議無關，一度要佢將袋放入locker先放行，最後仲要勞動會議秘書調停，李俊晞話自己唔會喺會議期間展示傳單，先可以入立法會。李俊晞話，其實佢只係無執袋，而佢個袋乜嘢都有，包括星期日嘅教會程序表、選民登記表，全部都同會議無關，咁嗰啲又使唔使擺埋落locker？


立法會秘書處回覆，根據《在立法會綜合大樓會議室出席會議或在公眾席旁聽會議的公眾人士須知》，公眾喺會議室或公眾席時不得展示任何標誌、標語或橫幅。