大媽去哪兒？

【明報專訊】早前中港兩地股市牛氣冲天，筆者早就提過係阿爺希望透過催谷股市，製造財富效應，以淡化經濟增長放緩的根本問題。有老友笑言：「成也大媽，敗也大媽。」阿爺本來諗住整旺個市，可以刺激內需，點估到大媽炒股賺了錢，不但沒有消費，反而循環炒股，搞到之前連金價都回落。家個市一郁，大媽震到散咗，李克強拍枱話要暴力救市，一眾有經驗嘅市場派財金官員唯有收聲，點知愈「暴救」就愈暴跌，連帶港股都跌到媽媽聲。


唔准沽貨 考驗黨性

不過咁，如果大家睇吓網上輿情，內地股民面對跌市嘅反應，好似比香港人冷靜，仲好得閒去做分析同安慰工作，最常用嘅口脗係：「股價暴跌算什麼？希臘才真慘，高福利下的失敗國……」無他，政府監控文宣工作精細，務求大家穩住個市，家惡到唔畀企業大股東同高管沽貨，之前套現嘅要買番，真係對大家嘅黨性一大考驗呀！不過令筆者最冒汗嘅係，李克強話要暴力救市翌日，香港全線左報唱好，連其中一份親建制嘅財經報紙都吹埋一份，點知個市連續跌不停，呢啲咪擦鞋擦到失埋專業囉。


朱總瀟灑不救市 再成佳話

中央官員在處理救市力度方面，明顯出現分歧。社交媒體熱傳朱鎔基在1996年底在財經工作會議嘅講話，面對當時股市泡沫爆破，朱總好型咁話：「賺錢不來找我，賠錢來找我，這有道理麼？……我宣布不托市，還托什麼市？政府不會管，股民自己投資，自己承擔風險。」


這番講話受到熱捧，某程度是因為李克強的暴力救市方法受到質疑，而似乎其他「市場派」官員如周小川、朱總前愛將樓繼偉等都主張較溫和的方案。有內地友人就話，另一熟財金的官員王岐山，本應好適合救市，但之前傳出因打貪工作被對手「反擊」，分身不遐。


大陸社會係好微妙的，李克強係唔會直接被人插嘅，說時遲，那時快，已有網絡評論把責任推給中證監。北大學者曹鳳岐認為造成此次非正常暴跌的情况之主要責任不在散戶，是證券監管部門監管不力和大的投資機構、大戶過度投機造成的。說得非常中肯，一矢中的！之但係，點解大嘅投資機構同大戶會過度投機呢？咪就係因為收阿爺柯打做嘢，製造財富效應囉﹗唔知係咪因為「甩轆」，前日熱傳呢位學者在鳳凰嘅影片，噚日又被消失了。


大戶過度投機 聽阿爺話

要用專業分析大陸股災原因？慳番啖氣啦，或許高呼一聲：「大媽去哪兒？」會更易得到答案。有中環友去咗日本玩，佢揸重貨架，蟹晒！佢千叮萬囑話唔好同佢提任何指數同「冧把」，作為「無貨」嘅朋友，咁簡單嘅道義，一定遵守！


[應正亮 廿四味]