曾鈺成鬧議員：仲表演唔夠？ 立會罵戰 建制催趕走長毛

【明報專訊】政改否決咗，建制派WhatsApp群組內容又爆完，但政界花生似乎愈派愈有，就喺立法會本年度會期最後一次特首答問大會上，民建聯蔣麗芸率領一眾建制派議員，大戰人民力量陳偉業（大嚿），派定花生同全港市民開心放暑假。不過立法會主席曾鈺成就對呢場鬧劇無咩興趣，一怒之下仲反問議員﹕「大家仲喺電視機前面表演唔夠咩？」


特首梁振英（CY）講過，一直願意同議員溝通，仲話若議員去禮賓府食早餐，食唔慣中式早餐，即場整腸仔煎雙蛋都得。不過，面對公民黨郭榮鏗問佢會否競逐連任，CY就無正面答，仲話提問唔符合《基本法》。而一眾建制派議員就先後提出規程問題，要求主席逐社民連梁國雄（長毛）出會議廳，激到曾鈺成爆seed﹕「唔使大家教我規程問題，大家仲喺電視機前面表演唔夠咩？」


最終被主席多次警告嘅梁國雄再發出笑聲，被逐出會議廳，曾鈺成隨即宣布暫停會議，點知議員「表演」先剛剛開始。


大嚿話蔣震「支持共黨」 激親麗芸

會議一暫停，黃毓民同陳偉業一唱一和諷刺民建聯「獻計」CY搞清潔運動，話董建華當年搞完全港清潔就落台，蔣麗芸瞬間彈出護駕，話清垃圾時一定要清埋泛民議員，「第一個掃你（陳偉業）！」

大嚿聽完反擊，叫蔣麗芸「返去問你阿爸啦」，仲話蔣父蔣震「支持共產黨」，結果再挑起蔣麗芸神經，令佢一度走向陳偉業理論，話其父係「抗日戰士」，鬧鬧吓蔣指住陳話，自己未搬對方嘅老婆同女出嚟，「你估我唔知你老婆同個女做咩呀」，最終蔣麗芸走出會議廳，鬧劇告一段落。