銀証邀客仔「為國捐軀」

【明報專訊】國難當前，呢排啲上市公司紛紛奮勇入市，爭住捐軀救國，喺呢場股災走在最前線嘅證券公司，自然應該更加英勇報國，不過小琴發現銀河証券（6881）有啲蠱惑，所謂「自己股票自己救」，雖然話搞咗個用嚟增持嘅投資計劃，畀管理層參與，但同時話會賣畀客戶，咁即係搬自己啲客嘅錢嚟救自己啫。


增持計劃轉向客戶兜售

話說呢兩日上市公司增持嘅增持，回購嘅回購，銀証噚日都出咗個公告，話搞咗個集體投資計劃，用嚟購買自己公司嘅H股（佢話可能會投資埋其他股票），公司管理層會參與認購，不過公司就唔會提供任何資金支持，最好笑嘅係，銀証話會向自己客戶兜售呢個投資計劃，認真有計。


如果講愛國，同行嘅廣發（1776）就無得彈，佢哋話員工籌咗10億（人民幣．下同）出嚟增持公司股票托價，除番廣發而家有成9300名員工，每人至少都要豪10萬蚊出嚟，貼錢打工仲要愛國，你話去邊度搵？

email: piano@mingpao.com

[小琴密語]