石禮謙認有份押後港大副校任命

【明報專訊】噚日泛民飯盒會除咗傾財委會加會對策，仲搵咗身兼港大校委會成員嘅經民聯立法會議員石禮謙一齊去開會，請佢講解吓港大押後討論副校長任命嘅事。


消息話，石禮謙喺會上承認自己有份要求押後副校長任命，仲同泛民議員講，報紙上嘅報道基本上都已經講晒成件事嘅詳情。不過，泛民見石禮謙見得十幾分鐘，所以傾唔到太多，泛民亦無討論有乜跟進行動。


另外，有消息人士同Emily講，早排曾約見港大高層了解副校長任命事件，話如果早前校委會投票決定副校長人選，喺「梁粉」人數佔優下，陳文敏好大機會不獲通過任命，咁樣會對港大造成好大傷害，但同時不滿陳文敏嘅人，當時又搵唔到理由攻擊佢，結果大家只玩拖字訣。