葛珮帆出書 曾主席讚書又讚人

【明報專訊】民建聯立法會議員葛珮帆（EQ）今年出咗3本關於環保、時政同香港文化嘅書，會喺本周書展亮相。噚日EQ舉行新書發布會，除咗家人撐場，唔少政界人都畀面，包括立法會主席曾鈺成同新聞統籌專員馮煒光。不過馮煒光遲大到，原因係要湊侄仔，但佢非常捧場，即場買咗EQ嘅故事書《暖暖南極》送畀小朋友。


馮煒光唔生BB 「幫人湊好玩啲」

3本新書分別係關於南極探險嘅《暖暖南極》、結集時政文章同發言嘅《帆心直說》，以及介紹西貢文化嘅《西貢》。曾鈺成大讚EQ嘅新書，話隨便攞起一本睇都會有收穫，仲讚EQ唔會因為要寫書而荒廢議會工作，係立法會最勤力議員之一，亦係「發言質素相當高嘅議員」。


唔使陪特首梁振英上京嘅馮煒光似乎仲忙過返工，佢因為要湊自己個侄仔同女朋友嘅侄仔，搞到發布會完場先出現。自言好鍾意小朋友嘅馮煒光，一見到葛珮帆助理嘅年幼兒子，立即抱B玩。問佢會唔會生番個？54歲嘅馮煒光笑笑口話，「我唔會啦，我成日覺得湊人哋個細路好玩好多，又可以幫吓人」。