內地一級運動員入港大

【明報專訊】被質疑受到佔領同本土派反內地人行動影響，今年報讀理大、嶺大同浸大本科課程嘅內地生大減三四成，Emily啱啱知道，報讀港大嘅內地生都由舊年逾萬人減到今年約9400幾人。不過港大又唔憂收唔到尖子，今年取錄咗309個內地生，比舊年多兩個，而今年有22個係內地高考嘅省、市或單科狀元，比舊年仲多咗6個。


港大內地本科生入學計劃今年亦首次試行「多元卓越入學計劃」，畀喺體育、藝術、社會服務等非學術領域表現優秀嘅學生申請，取錄嘅內地生包括兩個國家一級運動員，當中一人係來自雲南嘅排球一級運動員潘奕辰，佢會入讀理學士課程。


叻學生入港大仲可以有獎學金，最多每年拎到18.6萬，交完每年14.6萬學費後，仲夠錢畀宿費同基本生活費，港大話今年有超過三分之一內地生獲頒唔同金額嘅獎學金。