湯家驊重操故業 唔知市價

【明報專訊】即將辭任立法會議員嘅資深大律師湯家驊（Ronny），將會做番全職大狀，密密接案件搵真銀。Ronny笑言如果智庫「民主思路」等錢使救急，會考慮將自己份人工貢獻畀智庫。Ronny仲話因為太耐無接案件，唔知市價，要秘書提醒先識加價，否則價錢太低，唔會有人搵佢。至於加幾多？Ronny話好過做議員份糧。


噚日立法會舉行內務委員會年結記招，本身係內會副主席嘅Ronny會後同大家講吓未來計劃，但言談間將「民主思路」講成「公民思路」，似乎仲有啲掛住公民黨喎。


Ronny透露有啲二三線、無政治背景嘅商人已經口頭承諾捐錢畀智庫，大約有二三百萬，不過錢未到手。Ronny話要繼續努力，希望可以籌到600萬元，相等於智庫3年營運資金，仲話智庫喺炮台山道租咗個1000呎嘅單位作為辦公室。佢又話聽日會召開記者會，介紹智庫最新動態，同公布將有新成員加入。