要復牌 先炒人？

【明報專訊】上個星期A股急跌，啲上市公司集體「離家出走」，大部分都發公告話「因重大事項停牌」。不過好快，個市升番當然要齊齊歸位。不過，做戲都要做全套，A股復牌總要有個「正當理由」。


焦作萬方：董秘擅自發布公告

噚日A股上市公司焦作萬方出咗個公告，話公司董秘賈東焰違反公司信息披露管理制度，擅自發布停牌公告。公告仲宣布佢已經唔適合做董秘，決定解聘其董秘同埋副總經理職務。


其實A股市場多怪事，隨便出個停牌理由，大家都已經見怪不怪，如果係為咗復牌而要搞到炒人，的確無乜印象有見過。


小琴唔清楚，究竟公司停牌係咪可以由董秘一個話晒事，如果係，咁公司成個機制都好有問題；但如果唔係，咁同搵替死鬼又有咩分別呢？真相係點，我哋就不得而知，不過呢個停牌理由，真係夠絕。


[小琴密語 email: piano@mingpao.com]