「彤叔掌櫃」遷出新世界總部

【明報專訊】正所謂一朝天子一朝臣，過往深得「彤叔」鄭裕彤寵愛、綽號「彤叔掌櫃」嘅蒙古能源（0276）主席兼執行董事魯連城，自從2008年蒙古能源股價爆煲後，就盛傳佢地位下降。加上彤叔喺2012年退休後，「純官」鄭家純接掌，佢嘅地位就更加進一步下降。噚日蒙古能源有限公司就發公告，正式遷出位於中環皇后大道中嘅新世界總部，搬去上環干諾道西。


蒙能前身喺新世界數碼，2007年轉型收購蒙古西部6萬幾公頃煤礦，並獲彤叔兩父子入股。喺一連串利好消息帶動下，蒙能曾喺2008年升至18蚊，但其後同年8月尾爆煲後，就冇再點升過，噚日收報0.345。加上「純官」一接手就要佢贖番周大福20億CB（可換股債券），雖然件事最後拆掂咗，但「失寵」傳聞更甚囂塵上。


查實小琴好耐之前都去過蒙能喺新世界總部嘅辦公室，個時仲係兩層樓打通，裝修得金碧輝煌，直情成個皇宮咁款！不過翻查紀錄，原來蒙能喺2013年已經由兩層樓變做一層。家仲要搬離埋新世界總部，搞到小琴都有啲唏噓。


[小琴密語 email: piano@mingpao.com]