牛欄牌廣告「兒童揮手」嚇親人 夜歸市民等巴士發現

【明報專訊】1993年九廣鐵路嘅小朋友排隊玩火車遊戲廣告，當年搞出「鬧鬼」虛驚事件，Emily同唔少朋友印象深刻；多年後又發生「小朋友驚嚇廣告事件」——話說市民Twiggy前晚喺觀塘等巴士時，見到旁邊巴士車窗有成廿幾名「小朋友」同佢揮手，啲小朋友仲要係半透明嘅，嚇到佢個心離一離，定神睇一睇，先發現原來係牛欄牌奶粉嘅巴士廣告圖像。


市民Twiggy Tang噚日喺網上講番呢單「嚇親」事件，話佢前日凌晨收工後，喺觀塘碼頭巴士總站等車返屋企，點知見到隔籬線有架停泊嘅九巴，車窗旁有好多「小朋友」對住自己笑笑口、揮揮手，即刻嚇咗一跳，司機仲突然喺下層某排座位彈起身開車，佢再被嚇多一轉。


車內車外看都驚嚇

Twiggy事後同Emily形容嗰陣時真係「好驚，畀佢嚇一嚇，（之後搭車）成程車都瞓唔着」，事後將啲相上載facebook，好多網友議論紛紛，有人分享話原來喺車內向外望，都會見到兒童「黑影」，又有另一番驚嚇感。


牛欄牌暫未回應

路訊通發言人話，廣告指引只禁不雅、誹謗等違法同埋有中傷言論嘅廣告。至於牛欄牌，Emily噚日問過佢哋，至截稿前未有回應。