有話說﹕考評局親自解答文憑試疑問

【明報專訊】雖說文憑試考生已算是半個大人，但做家長點會唔緊張？學友社上星期公布放榜熱線有超過一半嘅求助電話係來自家長。而考評局喺放榜前嘅家長講座，由秘書長唐創時博士親自解答家長對文憑試的疑問。Happy Mama嗰日都有去八吓，嘩，座無虛席啊！


開放式題目二人以上評分

好多家長擔心作文呢類開放式考題，如果遇上「手緊」考官，咪好唔好彩？唐創時解釋，唔好以為淨係考生要考試，原來閱卷員都要。每年考評局會抽取部分答卷由審題委員會先改，作為樣本試卷，制定一份評卷參考﹕「呢啲樣本會派畀今年嘅閱卷員試改一次，如果佢哋嘅評分同委員會班專家評嘅分數差唔多，代表佢哋掌握到評卷參考，先可以正式評卷。」


當局亦設有雙評制度，由兩位閱卷員評閱開放式題目。如果兩人評分差異太大，就會再搵第三位閱卷員評分。得分差異仍然超出水平的話，就會再搵試卷主席評核﹕「即係話一份通識卷，最少八個人睇過，最多可以有十六人評過，確保評分客觀公正。」另外，網上評卷系統亦可確保每位考生獲平等待遇﹕「閱卷員改得太耐或太快，都有可能對考生造成不公。電腦會記錄每位閱卷員改每份卷的時間，分析到有無異常情况。」


應考語言「着數」與否非考慮

通識科係核心科目，好影響學生升唔升到大學。Happy Mama聽到唔少家長朋友質疑考評局只公開通識科整體成績，而無公開以英文同中文應考的考生分別的成績。唐博士指當局亦無公開其他文憑試其他科目的中英文作答成績，所以唔會對「通識」有另一個做法。佢認為家長唔應該抱住「派彩」的心態去睇應考語言﹕「學生在學校用咩語言上堂就應該用該語言應考，如果父母以為以某種語言應考『着數啲』就貿然叫子女更改應考語言，咁樣只會影響子女學習。」文憑試今年只係第四屆，對好多會考、高考出身的家長來說絕對係新事物，難怪大家特別緊張。如果你都想了解多啲，可以參加下一場考評局家長講座。舉行時間係8月8日（周六）下午2:30至3:30，地點在銅鑼灣高士威道皇仁書院。


登記網址﹕www.hkeaa.edu.hk/tc/events/parents_seminars_2015.html