簡志堅冀大夾沽空機構

【明報專訊】近日與沽空研究機構Glaucus隔空糾纏嘅中國天然氣（0931）主席簡志堅（圖），連日出來見傳媒進行反擊。佢講明仲有好多招未出，唔怕同沽空研究機構對着幹。例如可以諗吓派紅股或送股益街坊，甚至注入更多好項目賺錢，總之過到董事會、股東同監管機構批准乜都可以考慮。佢更唔介意日日見傳媒炮轟Glaucus，唔想Glaucus蝦小股民喎。


曾經是中國燃氣（0384）股東嘅簡志堅，雖然佢對後來未能夠同中燃氣進一步合作感遺憾，但係佢話商場無敵人，兩間公司啱嘅話可以合作。佢仲期望自己公司股價爭氣造好，大夾沽空機構，亦希望發起搞華資投行，喺香港市場捍衛上市公司價值。不過今次簡志堅就算畀空軍炸一炸，佢淨係中國天然氣手貨都值100億，蝕咗啖氣但未致大損傷，佢話點都唔夠早年救匯多利（即豐盛控股（0607）前身）難度咁高。


email: piano@mingpao.com

[小琴密語]