鄉局下月中傾新東補選

【明報專訊】鄉議局噚日開會，由鄉議局前主席劉皇發個仔、現主席劉業強主持會議，最近有報道話，強哥同鄉議局副主席張學明不和，但發叔話「啲人乜嘢都作古仔㗎啦」，話只係啲人揣測，又話新聞界嘅朋友「想像力豐富」，似乎唔係好想再提呢啲事。不過，有鄉局中人預告兩人不和事件陸續有嚟，甚至會影響鄉議局立法會議席。


有鄉局中人話學明不滿劉業強之說時有所聞，更指再咁落去，學明分分鐘推現時另一副主席林偉強出嚟選立會。發叔噚日被問到下屆立法會係咪由佢繼續出選鄉局議席時，話要睇吓自己健康，如果健康係向好嘅一面發展，都有興趣。佢承認立法會工作繁重，會睇人力、體力支唔支持到，「不過你都唔一定要落手落腳做，你可以喺旁邊做嘢」。


佢又自嘲「人老就樣樣都遲鈍啲」，但「覺得自己都仲可以」，觀乎發叔咁有影響力，似乎要挑戰佢仲有難度。至於鄉議局會唔會出選立法會新界東議席嘅補選，發叔話佢哋8月16日開集思會，會討論吓，10月前會有決定。