2480萬起泊單車場 8萬蚊一個位 南丫人批設計差

【明報專訊】南丫島唔少居民以單車代步，位於榕樹灣渡輪碼頭旁邊嘅單車停車場，最近投入服務後，惹來劣評如潮，居民鬧爆設計有問題，車位數量不足應付所需，加上造價昂貴，要2480萬元建築費，約300個車位平均每個造價高達8萬蚊，貴過部單車，難怪被居民斥為另一大白象工程。


民建聯議員爭取10年

網媒Hong Kong Free Press報道，呢個泊車場係由民建聯區議員余麗芬用咗10年時間先至成功爭取興建到，政府於2013年正式拍板興建，當局原先預計建造費用1800萬至2000萬，結果埋單2480萬元，至少超支24％，平均每個車位約8萬元。


部分需填海闢地

余麗芬截至噚晚截稿未有回應。翻查資料就知一個單車場點解會咁貴，榕樹灣渡輪碼頭附近並無單車停泊處，唔少居民將單車泊喺碼頭行人橋兩側，阻塞碼頭通道，故區議會早於2003年已提出興建專供單車停泊嘅泊車場，政府向區議會提供嘅設計圖，與現時建成嘅車場基本一致，而睇圖則，發現當局要填海闢地畀人泊單車。單車場每條線設有多個獨立欄杆，但有居民批評，問題就出喺呢度，認為每條欄杆只可以泊一架單車，浪費空間，問點解唔將欄杆連起，泊車數量就會大增。