阿爺救市你炒人﹗

【明報專訊】呢個7月，太多花生，但同時巧驚驚。當兩星期前阿爺忙於暴力救市之際，添馬艦一角卻在密謀上演一場剷除異己大龍鳳，筆者感到極度心寒，雖然仲有兩年，但政府內有良心之士，已買少見少，有人為咗權力不擇手段，真替香港感到極度擔憂。家除咗講句「不是不報，時辰未到」去安慰自己外，諗唔到點樣可以息怒。


在拆解今次雙局長被辭職事件之前，想同大家回顧一下一些關鍵日子（見表）。由上京見張德江，到炒去根正苗紅的曾德成，梁特最想強調自己仍得到中央高度信任。筆者感到非常奇怪，內地有沒有一個省長或市長，要天天重申自己獲中央肯定和支持？此舉可有兩解讀：一是真的不獲中央信任，缺乏安全感，天天此地無銀；二是為連任鋪路，把中央支持他連任塑造成既定事實。所以，背後驅使他做出種種騎呢之事，就是連任的欲望。


據政府中人透露，曾俊華、曾德成、鄧國威皆是梁特的眼中釘，因為他們會向梁特不合理和敗壞綱紀的要求說不。有消息話，呢個剷除異己的部署，已經密密斟咗成個幾月，刺激到梁特快刀斬亂麻，突然求見張德江同加快炒人，就係發生咗「習握手」﹗


「習握手」救了曾俊華一命

因此，有官場中人認為，曾俊華本來係被郁對象，但阿爺強調炒不得，因為要穩住中港金融體系，於是在很短時間內安排了一場「習握手」，目的係要讓689死心。與其說習大大欽點曾俊華，不如說救了他一命。而後來內地股災，阿爺暴力救市，香港處變不驚，如當時有任何財金官員人事調動，一定會影響個市，證明了習大大是明智的。


但習大大也並非千手觀音，總不能人人都握，曾德成同鄧國威被篤背脊的指控，對阿爺來說，難以隻眼開隻眼閉，兩人都同「佔中」有關，如不處理，好難向鷹派勢力交代。曾德成掌管民政事務，要搞好「人心回歸」，佔中青年就係因為人心未回歸，先會連屋企都唔歸，走去佔中；鄧國威吓吓「保護公務員」，拒絕按梁的要求去查找哪些公務員是黃絲，亦拒絕逼公務員簽名撐「反佔中」，即使被人拍枱大罵，鄧國威都頂住了，筆者對於佢嘅遭遇感到難過，但不用再「恥與為伍」，又很替佢高興。


曾德成突被免職 老愛國氣難下

不過咁，阿爺接受梁特的免職建議，唔代表認同佢嘅處理方法；曾德成是中央直接安插在特區班子，歷任三屆政府嘅高官，因為愛國而坐過政治監，就算免佢職，都唔應該用一種極不尊重，突然叫人執包袱的手法，呢啖氣，叫傳統一眾老愛國點啃得落？令筆者佩服的，是曾德成及其兄曾鈺成的從容應對；今年初其政治助理徐英偉本來辭職返娘家民建聯做總幹事，但後來因為要過冷河，即使離開政府，也不能沾手區議會選舉工作，最終留低。當時曾德成在物色接班人過程中，頭都大晒，佢唔想有任何變動，亦唔需搵好出眾嘅人，最好係平平淡淡、無乜人識嘅素人，因為佢早已疊埋心水做埋呢屆就唔做。


阿爺接受建議 不代表認同處理手法

每次的風波，都是一面照妖鏡，葉劉急不及待出來插曾德成同鄧國威不適合做局長，筆者奉勸伊人切勿跟車太貼。


[應正亮 廿四味]