漫畫節今開鑼 星戰宇宙飛船首曝光 PS4虛擬實景新game登場

【明報專訊】第17屆香港動漫電玩節今日開始一連5日喺會展舉行，大會噚日安排傳媒率先入場參觀。現場所見，參展商密鑼緊鼓佈置攤位。截至噚日傍晚，場外已經有近百人排隊，排頭位嘅陳同學星期二朝早已嚟到，打算購買PlayStation4《Metal Gear》電玩主機。


今年動漫節會為入場者帶嚟重重驚喜，PlayStation話，虛擬實景頭戴裝置「Project Morpheus」係今年嘅焦點，會有體驗區畀公眾戴住嚟試玩4款全新遊戲，其中一款全球未公開過嘅神秘作品今日中午12點半會喺會場公布。


香港玩偶公司Hot toys會展出全球首次曝光嘅《星球大戰》1:6比例宇宙飛船「千歲鷹號」，機身全長約18呎、闊12呎、高4呎，重約1噸。負責人話，今次展覽市民可以同模型近距離接觸，相信「能令所有星戰迷感動」。


玉郎漫畫出限量封面全集

香港漫畫出版公司玉皇朝經理陳寶珠向Emily展示兩款賣250蚊嘅《玉郎漫畫．珍禧紀念封面大全集》。雖然兩款封面顏色唔同，但內容一樣包括咗263個漫畫本封面，每款限賣300本，每本都有獨立證書。


另外，100%香港創作嘅手機遊戲《勇者的盆栽》今年首度參展，發言人表示，家香港、台灣嘅總下載量已經有25萬，預計動漫節之後下載量會增加1倍。