新聞類別
財經
詳情#
【明報專訊】一向係傳媒之友嘅工總主席劉展灝（Stanley）下星期二就要卸任，噚日佢最後一次以工總主席身份同成班記者午餐聚會，席間佢發表感言，自己响工總咁多年，最大得着就係識到一班業界行家，擁有一班工總同事，同埋接觸到好多傳媒朋友，佢仲話睇住唔少記者由細到大，結埋婚生埋仔"口添"。咁又真係唔出奇，大大話話Stanley做工總副主席10年，做主席兩年，如果計埋佢加入工總嘅時間，真係要用N年去形容，所以好多行家一要做有關港商題目，都會第一時間諗到請教佢。
雖然秉承工總主席例不連任傳統，不過Stanley下一站去向早就清楚，政府已經委任佢接替陳鎮仁出任香港生產力促進局主席，且已於7月1日生效，為期兩年。點解退而不休？Stanley話其實自己係有打算休息下，不過政府叫到，而工總同生產力局一向有合作，宗旨亦係為本港工商業謀發展，所以自己都想繼續出一份力。
蘇家碧過檔港鐵 人工高過CY
話時話，工總唔單止換主席，仲會換埋總裁，事關原總裁蘇家碧俾港鐵挖角，由前律政司政務專員何建華响9月接任，Stanley仲爆料蘇家碧係被高薪挖走，人工高過CY"口添"呀。
[小琴密語]
回應 (0)
