張志剛：唔答，得唔得？ 被問梁換局長有否問意見

【明報專訊】政府星期二同日公布前民政事務局長曾德成「樂意退休」同公務員事務局長鄧國威「呈辭」，但唔少消息都話，兩人係畀特首梁振英撤換。被認為係梁振英智囊嘅行政會議成員張志剛（圖），噚日畀人問到CY有無徵詢佢意見，就話「唔答，得唔得？」佢又認為兩個局長同日離任，同所謂「老愛國」同「新愛國」有衝突無關，唔應該用呢個角度解釋事件。


指換官員平常 不認為有內情

有行會成員同Emily講，CY星期二開記者會「炒人」前開行政會議，並無提過換局長嘅事，事前亦冇消息，有行會成員都係開會後返去睇電視先知道換局長，講笑話可能只係部分核心成員先知道換人部署。


張志剛噚日喺電台講，「政治問責嘅官員嚟嚟去去係好平常，大家唔需要諗咁多」，佢又認為兩個前局長已經交代離職原因，係「樂於退休」同「不可預見嘅家庭問題」，只係大家唔信。


4個新舊官員當日無同CY一齊見傳媒，張志剛話，唔反對將門面工夫做好，但認為咁同別有內情係兩回事。