黑武士帶兩白兵明報探班

【明報專訊】最新一部星戰電影《星球大戰七部曲：原力覺醒》年底上映，家已經開始宣傳。黑武士噚日帶埋兩個白兵嚟《明報》探班，員工幾乎湧晒出大堂排隊同佢哋selfie，場面哄動，Emily當然唔執輸。咪睇佢哋擺甫士chok到爆，原來黑武士同白兵由朝早7點直踩到傍晚，兵分兩路去咗6間傳媒機構，齋聽都覺得唔簡單。


逾百星戰迷下周迪士尼巡遊

另外，迪士尼樂園下星期一中午仲會有大型巡遊，110個星戰迷會打扮成經典角色巡遊迪士尼30分鐘，焦點包括首度亮相、來自泰國嘅艾米達拉女王Jolynn Beernaert。華特迪士尼負責人話，每套衫都係粉絲自己出錢訂做或者改衫，每套要2萬至4萬蚊，仲要由《星戰》製作公司Lucas Film專人研究套衫嘅所有細節啱唔啱標準。佢舉例，白兵套衫嘅流線型、質地都唔易達標，而且要配合粉絲嘅身高。好彩忠實粉絲大部分都好有心，Lucas Film同佢講，好多衫仲靚過電影戲服