家計會為生隊籃球隊廣告解畫

【明報專訊】家計會早前出咗新嘅電視廣告，問「幾個至夠數？」，講到5個可以有成隊籃球隊，結果唔少網民都批評居然鼓勵人生5個。Emily記得，以前家計會有個經典廣告「兩個夠晒數」，唔通而家變咗5個先夠數？家計會近日就出咗個澄清，話個廣告其實係叫大家無論生多生少，都應及早考慮同做好計劃，家計會無意干預任何人嘅生育決定。


認手法誇張 籲衡量能力才生育

家計會話，近年政府推出嘅家庭友善措施，目的係希望夫婦可以喺家庭友善環境之下實行生育計劃，並唔係由政府主導市民生育。有啲人質疑家計會出呢個廣告，係因為香港生育率下跌，家計會就話香港生育率喺2003年跌到最低點，但近年已回升，所以兩者無關係。


至於廣告講「一人獨奏、二人雙打、四人大合唱、五人組成籃球隊」，家計會話係誇張表達手法，可惜大家誤會咗個廣告，以為係叫大家生5個都冇問題，家計會其實係叫大家衡量自己能力、意願去決定生幾多，咁先係負責任。