中央妙用「逆雍齒法」

【明報專訊】有老友見我用劉邦用陳平來比喻CY起用劉華（編按﹕劉江華），認為太抬舉他們，係咁嘈我，於是我話，只不過是比喻，又唔使咁認真，老友話既然如此，譬如劉邦是CY，佢又點解要曾局長離職，我老友都打橫嚟講，首先，要求曾局長離職的一定不是CY，如周顯在《明報》日前專欄所說，在香港無人可以有如此權力，就算CY真的希望曾局長離職，都只會用勸喻方式，還得鋪一個非常大方得體的下台階，炒佢魷魚，全中國都不是太多人有此權力，差不多要最高領導人才可以。而且，今次是不尋常做法，一定有特別原因，其他人不知，張良就一定知。


當日，劉邦打敗了項羽，諸將坐定定等封，劉邦是個口爽爽的人，况且佢老婆又咁孤寒，於是將供應物料的人放在第一位，蕭何心知肚明，知道如果佢攞頭功，其他謀臣將領，功勞大極有限，劉邦這個方法，只不過是止咳，諸將稍後依然不服。


劉邦封雍齒 息將領不滿

在無計可施之下，唯有問張良，張良反問劉邦，在諸將之中，誰人與他的關係最差，而其他謀臣將領又知道的？劉邦非常肯定答雍齒。當劉邦聽完張良的說話後，立刻將雍齒封王，諸將見連雍齒都可以封王，他們自問與劉邦關係不差，戰功又比雍齒高，他日的王位一定比雍齒高，於是事件就此平息。諸將其實不知道，劉邦早有打算不封異姓王。


下個「被離職」或是高民望局長

所有公務員都知道，曾局長根正苗紅，就算有天大錯誤都唔會「被離職」，今次曾局長「被離職」是「逆雍齒法」，宣示以後任何一個公務員都可以被離職，「威哥」（編按﹕鄧國威）只不過是「示範單位」，自此之後，各問責首長都危危乎，少做少錯，不做不錯將會成為過去式。


問題是，下一個被離職問責官員是哪一個，我心目中當然已有一個人選，不過唔敢講，因為那人民望很高，就算講了，大家都唔會相信。


紀惠集團行政總裁

[湯文亮 敢說亮話]