為無家者盃港隊籌款 李小加長毛合作無間

【明報專訊】「阿姆斯特丹2015無家者世界盃慈善籌款賽」噚日喺旺角舉行4人圍板足球賽，為香港代表隊籌款。港交所行政總裁李小加、社民連立法會議員梁國雄（長毛）、民建聯梁志祥，以及工聯會郭偉強齊齊落場踢波，對戰無綫電視「兄弟幫」。政經界隊最後雖然輸波，但佢哋落場表現落力，踢起波上嚟不知幾勇猛，特別係平日西裝骨骨嘅李小加，仲有波入。


今年係香港隊連續第11年參與無家者世界盃，所有參賽者一世人只可參賽一次，目的係幫無家者重建信心。噚日最高氣溫有31.3℃，但無阻長毛、梁志祥、郭偉強同李小加落場踢波。慈善籌款賽有別一般球賽，每隊只係派4人出賽，而政經界雖然輸波，但默契都幾好，助攻、射門難唔到佢哋。


噚日長毛亦係最搶鏡，皆因佢踢完波就除波衫唞涼，但佢連衫都未著得切就被邀請一齊大合照，成日踢波嘅長毛身材都保持得唔錯，肚腩都唔係好大。