行會暑假延至3周 特首辦：議程已處理晒

【明報專訊】特首梁振英（CY）2012上任時，雷厲風行改革行會，將暑假休會期由9星期大減至兩星期，仲話每次開會都要長啲時間；不過，3年後政府噚日就公布，今年嘅暑假行會休會時間延長至3星期，即係比去年放多一個禮拜假。


葉太笑言行會非「馬會啲馬」

政府公布，行政會議將於7月28日、8月4日及11日暑假休會。點解行會今年要放長啲假？特首辦就解釋，「特區政府非常重視行政會議的工作，行會一向迅速及認真處理各項議程。由於行會在暑假休會前已處理政策局提交的議程，未來三周亦沒有新的議程，因此在徵得議員同意後作出有關安排。」


行會成員葉劉淑儀就講笑話行會成員唔係馬會啲馬，夏天要唞暑，而係行會會配合立法會。佢話行會通過嘅條例草案，會遞交立法會審議，但立法會暑假也休會，所以行會通過草案仍要等立法會開會，所以行會先休會。佢話以前行會休會9周，今年改到3周，都唔算長，而若有急事，特首仍可以緊急召開行會處理。


Emily就記起，2013年5月21日嘅會議，行會都以「沒有議程」為由，罕有取消會議，當時惹起爭議，有評論指難以理解作為最高行政機關嘅行會，點解會「無故斷纜」，又指政府「絕對不會無事商討」。