民主黨「搏盡」 口號好熟面口

【明報專訊】有市民同Emily講，近期喺葵青區見到民主黨嘅宣傳物品，用「為葵青搏盡」嘅口號做宣傳，認為民主黨有抄襲元朗足球會之嫌，因為元朗隊好耐之前已開始用「為元朗搏盡」口號，仲喺巴士車身廣告及網頁上呼籲球迷支持佢哋「搏盡」。


不過，「搏盡」二字又無專利嘅。民主黨副主席尹兆堅就話，民主黨喺雨傘運動後希望可以帶出該黨「一手撐傘、一手搏盡」嘅信息，阿尹話「搏盡」只係香港普通語言，不論做咩事，做人「搏盡」都係正確態度，佢都好歡迎有人為元朗搏盡㗎。


民主黨太子總部6月裝修完成，辦公室掛咗一幅以雨傘運動為背景嘅牆畫，畫上就寫上「為香港搏盡」字句。