回應「黑幫」報道 葉劉指誇張失實

【明報專訊】《壹週刊》噚日封面故事以「政黑大融合」為題，仲登埋新民黨正副主席葉劉淑儀、田北辰及被指係黑社會高層嘅相片，報道質疑新民黨同黑社會關係密切，包括田北辰早前出席被指係社團高層嘅壽宴；又話新民黨區議員蘇嘉雯嘅爸爸係「屯門猛人」，又講到黑社會成員係新民黨幕後金主云云。


報道指控嚴重，葉太噚日就喺facebook回應，話報道「穿鑿附會，內容誇張失實」。佢話自己同田二少作為議員、黨正副主席，日常獲邀出席各種活動同宴會，包括報道所指嘅，都係不足為奇，但宴會仲有咩嘉賓，就係由主辦單位主導，佢哋唔可能左右。葉太話，好多人都係認同新民黨理念，有人入黨、有人選擇捐款，但無個別人士係所謂嘅金主。