民建聯邀猛人搞閉門工作坊 教界嘉賓封口 拒回應港大事件

【明報專訊】民建聯上星期見完全國人大委員長張德江後，主席李慧琼表明會加強做政策研究，協助政府施政，噚日該黨就邀請咗唔少業界人士，好似公開大學校長黃玉山、鮮魚行學校前校長梁紀昌、港大專業進修學院院長李經文等教育界及青年界別代表，閉門搞政策工作坊，討論「教育與培訓」。


工作坊閉門舉行，但民建聯都發採訪通知邀請記者去採訪，唔少行家見到名單有唔少知名人士，加上前晚港大校委會又有學生衝入會場，當然想問吓一眾嘉賓回應，但各人都封口；當記者喺會議室外等候，更有民記職員問記者「玩咩呀？」，搞到行家們呆等兩個鐘，「食白果」之餘亦唔多高興。


李慧琼會後話，有問過嘉賓想唔想同傳媒傾幾句，但對方都唔多願意，對此抱歉。佢總結會面時話，會上大家都認同要增加大學學額、政府應提高對自資院校資助、對家長做好生涯規劃嘅期望管理等。民記稍後會就「事業發展」、「國情國史、德育及正向教育」再搞工作坊，整理建議後就會交畀特首。