新奧姊妹公司被查違規減持

【明報專訊】最近內地班上市公司股東相信都好頭痕，事關阿爺救市唔畀減持之餘，仲講到明要查有冇人唔聽話犯規，搞到班股東真係風聲鶴唳。


中航工業炒涉違規總經理

噚日就輪到新奧能源（2688）响內地上市嘅姊妹公司新奧股份出事，原來佢地有個股東深圳市平安創新資本投資有限公司收到中證監嘅調查通知書，話佢地減持新奧股份涉嫌違規，要立案調查。


不過講到丟架都應該係中航工業，之前響應中央救市，佢哋集團董事長林左鳴好高調咁話會大力支持，又講到係外來資金惡意沽空A股，仲成立「護盤特別行動小組」，殊不知轉個頭就畀中證監查到佢地旗下上市公司中航資本嘅總經理楊聖軍涉嫌違規減持，正所謂老細面子為大，中航資本當然要立即做嘢，即日就宣布炒楊聖軍魷魚。


[小琴密語]