泛民「上山落區」撲水 公民黨登高 工黨做「小販」

【明報專訊】為區選立選準備

踏入暑假，立法會休會，唔少泛民主派政黨就趁空檔籌款，為今年區議會選舉及明年立法會選舉做好準備，為爭取市民支持，不惜上山、落區仲做埋小販。公民黨今年忙住搞政改，無搞黨慶聚餐，Emily聽講搞到財政有啲壓力，所以星期日就搞咗個登高籌款幫補一下。翻查資料，上年公民黨成立8周年籌款晚會，大大話話都籌到270萬元。


湯家驊退出公民黨引發新界東補選，而公民黨星期日遠足就征服獅子山，「打入」新界東，以展現克服困難爭取民主嘅決心，參加者可以加入由黃大仙行到沙田博康邨嘅「體驗組」，或者參加「挑戰組」行到去獅子山公園入口。


工黨8月初就打算落區做「小販」，賣「文化Tee」籌款，仲已經申請咗幾十個籌款牌，至於呢件「文化Tee」幾有文化？Emily聽聞設計仍未有定案。


民主黨街站賣獎券 籌60萬

民主黨前排都有賣獎券籌款，具體籌款數字仍在核數中，不過單計喺街站賣獎券，一共籌得60萬，較去年多兩成。