石輝任截取監察專員

【明報專訊】現任截取通訊及監察事務專員邵德煒將會喺本月16日退休，在任3年都好低調，有別上手退休法官胡國興。政府噚日宣布退休法官石輝（Mr Azizul Rahman Suffiad，圖）會接替邵德煒出任專員，任期由8月17號生效，為期3年。


石輝1975年喺香港攞到大律師資格，私人執業直到1997年，97年至98年出任高院原訟法庭暫委法官，98年至舊年一直出任高院原訟法庭法官。石輝喺《截取通訊及監察條例》2006年生效之後，曾經有8年擔任《條例》下嘅小組法官，對《條例》都相當熟悉。


立法會議員涂謹申話，過去3年邵官都無乜特別嘢做過，「唔會話佢好差，但亦都唔係好好，無首任專員胡官（胡國興）咁主動」。佢期望新任專員石輝可以「把好關」，喺截取通訊嘅抽樣調查上做多啲。民陣觀察成員王浩賢話，希望新專員對執法部門嘅截取通訊行動，可以保持警覺同批判性。