盧寵茂指有醫生忘救人 片段見歐耀佳喊「畀佢出去」

【明報專訊】喺上周二學生衝擊港大校委會事件中送院嘅校委盧寵茂，噚日喺商台節目《政好星期天》話，受傷後被示威者圍住上唔到白車，曾經想搵過一個醫生幫手叫人讓路，對方話「關我咩事呀，呢啲人唔係我叫嚟」，盧寵茂話「佢好似講得有道理，但事後我不斷喺度諗，點解政治要鬥爭，令一個醫生將救人嘅天職完全唔記得，呢樣嘢我真係非常之傷心」。


Emily問佢係咪講緊當日有份組織港大校友關注組集會嘅歐耀佳醫生時，佢答「天知」，又話講道理嘅人會明白佢，而佢亦會忍一時風平浪靜。歐耀佳就「對號入座」並呼冤，話佢有幫盧寵茂開路。


睇番新聞片段，當晚照顧盧寵茂嘅袁國勇同歐耀佳講，「你係醫生嚟㗎嘛，你喺前面開路啦」，歐回應「我係醫生，唔係幫手」。歐同Emily講，當時佢解釋「我叫佢哋（堵路者）唔走」，盧寵茂聽到就「充滿仇恨」咁望住佢話「你睇吓你哋搞成咁」，歐即刻開咪大聲話「你諗清楚係邊個搞成咁，係校委會所做嘅嘢」。


歐稱被質疑感失望

歐醫生話堵路嘅唔係校友關注組嘅人，佢早已經企喺欄杆嗌咪勸人讓開。Emily睇無綫新聞片，見佢真係有大嗌「佢隻腳有傷，麻煩畀佢出去」。歐醫生話可能當時太混亂，盧寵茂聽唔清，「但佢識我咁耐都覺得我會做呢樣嘢（唔救人），我都好失望」。


歐醫生話，1981年佢喺港大讀醫時住聖約翰堂，同低兩屆嘅盧寵茂一齊踢波，好熟吓，畢業後又一齊喺醫管局轄下委員會做委員，過去非常欣賞同尊重佢。之但係去到舊年，盧公開批評佔中係癌症，歐醫生就話生癌嘅係政府。