民記幹事西環擺「紙板陣」 街坊懷疑阻街報警

【明報專訊】今年11月就係區議會選舉，有唔少政黨或有意參選者都加緊宣傳「成功爭取」嘅政績。有市民噚日朝早喺西環水街發現一排「人板」企喺街邊「熱烈歡迎」自己，紙板上寫住「梗有一刻喺左近」，上面仲有民建聯標誌。


一條街擺19個紙板公仔

原來呢個係民建聯中西區支部社區幹事楊學明嘅宣傳奇招，現場總共擺咗19個近似真人比例、5呎5吋高嘅紙板公仔，旨在話畀人知民建聯有幾咁關注爆喉對街坊嘅影響。Emily去咗水街度觀察，發現宣傳板佔咗六分之一條路，十分壯觀，但因為紙板公仔容易撞跌，行經街坊都要分外小心。


楊學明認無通知食環 稱不阻街

後來可能有街坊懷疑宣傳品阻街而報警，有警察到場了解，而身為紙板人「男主角」嘅楊學明亦現身，佢承認擺紙板前無通知食環署，但就話唔會阻街，仲向Emily解釋每個告示板都係佢過往跟進當區爆水喉工作情况，希望大家印象深刻啲。


至於係咪有意出戰區選，楊學明話正在考慮中。Emily翻查資料，楊學明上屆區議會曾經出戰水街選區，但輸咗畀民主黨嘅黃堅成。