日遊戲公司 「朝鮮式」管理

【明報專訊】曾經開發過《Metal Gear》、《寂靜嶺》呢啲遊戲名作嘅日本遊戲公司Konami，喺帶畀玩家歡樂嘅同時，近排就將好多員工送入噩夢一般嘅地獄。據《日經新聞》報道，自靈魂人物小島秀夫早排離巢自立門戶後，公司對於一班留任員工採取朝鮮式管理，實行唔畀上網、唔準食飯超時，甚至將工作人員調去做保安或者清潔，問你死未。小島秀夫所在嘅「小島工作室」部門，家已經改名為「第八生產部」，成個部門嘅電腦上唔到網，只可以發內部信件。除咗公關部，其他員工都無自己固定嘅email，公司會每隔幾個月就隨機向員工分派一個email地址，仲到處安裝攝像頭，用嚟監測員工一舉一動。


咁都唔止，甚至連食飯時間都被嚴格監控，員工只要離開公司食lunch，都有張計時卡統計用時，如果離開得太耐，會用全公司通報批評。如果負責遊戲開發嘅員工做得唔夠出色，公司未必炒咗你，不過就會把人調去做公司保安，或者清潔人員。如果有員工喺fb宣布自己離職，其他在職員工如果被發現畀咗個Like，就會被調去其他組。


咁恐怖嘅政策，小琴真係O晒嘴。工作環境人人自危，邊個有心機再去認認真真整一款好遊戲呢？


email: piano@mingpao.com

[小琴密語]