田少抽水之餘想偷師 「40萬拉Banner求婚」熱議

【明報專訊】自由黨榮譽主席田北俊個facebook可算係本港政壇中最有話題嘅人物之一，皆因佢每次出post，似乎都要抽吓水、寸盡政圈事。田少噚日又嚟料，抽嘅唔係政治事件，而係近日好多人談論，有關37歲港男好似豪花咗40萬蚊求婚、安排直升機喺維港拉巨型橫額等。近日不時落區宣傳嘅田少就喺fb話，助理建議佢出40萬搵直升機拉banner，等佢哋唔使日日企街咁辛苦喎。


田少喺fb上載咗張喺街上處理緊印有佢相片嘅易拉架，佢留言話助理建議，40萬田少實有，可以抄吓人哋搵直升機拉banner；但田少就話﹕「大拿拿（嗱嗱）四十萬咁使法，我以後唔使出來行啦！」助手就話可能女性選民都鍾意喎，田少把口就叫助理快啲抹乾淨個易拉架留番下次用，但就話自己心諗呢條橋「好似有得搞」喎。


網民對此反應不一，有人建議田少「用40萬去搞高級蛇齋餅糉好過用直升機賣廣告啦」，亦有人話田少用40萬可以幫到「好多老弱婦孺」。