殷曉靜讚工商界 楊釗唔識叫人拍掌

【明報專訊】今年喺中華人民共和國成立66周年，工商界代表噚日開會成立工商界同胞慶祝籌委員會，邀請咗中聯辦副主任殷曉靜出席。殷曉靜噚日盛讚香港工商界對祖國有汗馬功勞，仲由中國被封鎖開始數工商界嘅貢獻。作為工商界代表梗係要用熱烈掌聲回應，可惜籌委會執行主席中華總商會會長楊釗，發現自己唔識用普通話講「掌聲」二字，最後仲用廣東話問台下代表，點用普通話講「掌聲」。


殷曉靜話喎，66年來，共產黨帶領全國人民自強不息，將滿目瘡痍、百廢待興、一無所有嘅落後國家，發展到家成為賞娥奔月、蛟龍下海、舉世公認嘅科技強國，形容共產黨將舊中國建設成統一新中國，譜寫中華民族同人類發展史嘅一章，而香港工商界自改革開放，至香港回歸前後都堅決支持祖國發展，有汗馬功勞。


足夠經費賀國慶毋須籌錢

籌委會決定9月開始喺中華總商會大廈牆懸掛祝賀國慶的大型掛畫，9月14日喺港島香格里拉大酒店舉行國慶酒會，估計要用40萬，而籌委會家仲有64萬活動經費，夠找數有突。楊釗宣布今年搞國慶唔使籌錢，但籌委參加酒會就要先畀錢整襟牌，每個盛惠630大元。