破小偷救女嬰 國泰員工獲嘉獎

【明報專訊】國泰航空和港龍航空噚日舉行「Betsy Awards 2015員工嘉獎禮」，一共有16個員工同5組機組人員攞獎，得獎者包括成功偵破小偷、休假仍幫助乘客嘅空中服務員，仲有人喺飛機勇救女嬰。


得獎者機艙事務長潘美美（Salina）今年2月喺前往迪拜航班，遇到BB女因食物骾喉幾乎窒息，立即從嚇親嘅媽媽手裏面搶咗個嬰兒急救，佢一邊急救，一邊用手擋住媽媽，最後B女開始呼吸，Salina先發現個口甜甜哋，原來B女食朱古力餅鯁親，佢幫女嬰人工呼吸仲吸出一粒朱古力餅碎。另一獲獎嘅郭錦靜（Ivy）係高雄機場顧客服務主任，舊年原定經香港去日本福岡度假，點知撞正颱風海鷗吹襲，搞到飛機要折返高雄，Ivy雖然放假，但仍以專業精神安撫乘客，最後仲有乘客電郵讚揚佢。