回港撐偲嫣 梁美芬棄見領導人

【明報專訊】幾個青年團體訪京今日應該會喺人民大會堂見到國家領導人。青年代表團噚日見完港澳辦主任副主任王志民，由立法會議員梁美芬代表接受記者提問。但唔講唔知，行程未完，梁博士已急急腳搭飛機返咗嚟香港，究竟有咩咁重要，令梁博士連國家領導人都唔見、要趕返嚟香港呢？


原來，正義聯盟召集人李偲嫣今日下晝會開記招，成立正義聯盟黨，有消息同Emily講，原來梁博士準備今日撐場。亦有人話，佢之前已經答應咗出席一啲活動，番香港唔係只為見偲嫣。Emily噚晚打畀梁博士電話，鈴聲已經轉返係香港鈴聲，但就飛咗去call台。Emily截稿前未搵到梁博士回應。