ING請員工遊希臘掃LV

【明報專訊】今年市道改善，零售業表現好，保險業生意更突飛猛進，全靠「人仔」帶動。ING保險香港今年上半年嘅新保費收入，同舊年比升咗106％，達到9.2億元，人民幣保險產品係其中一個主要因素。為咗獎勵260位表現出色嘅員工，ING請佢哋遊希臘，趁住歐元貶值，員工大出血掃LV，當地售貨員一見佢哋都大叫「Welcome Chinese!」（歡迎中國人！）

香港及澳門保險及退休金聯席主夏哲偉（Wim Hekstar）啱啱同員工遊完希臘返嚟。希臘受債務危機困擾，旅遊業係其中一項救市行業，Wim話佢哋今次去希臘，幫助當地經濟。因為ING員工落力掃貨，尤其係去LV店時，有同事一口氣掃咗12個袋、行李喼等，獲得售貨員盛情款待。咁呢批貴賓買得狠，售貨員當然加倍落力招呼啦。

員工落力掃貨 救希臘經濟

來自荷蘭嘅Wim話，香港經濟環境反彈好快，歐洲環境似乎仲係陰雲密佈。香港業務上升，夏哲偉話主要係人民幣產品反應好，加上銀行銷售網絡帶動收入增加。ING香港現有1500個保險代理，預期明年會增加到2000人。ING澳門表現都唔差，有43％升幅，即2400萬元新保費，不過佢哋嘅獎賞團冇咁豪華，冇得去歐洲，只能去東南亞國家。

報料電郵﹕piano@mingpao.com